Aitziber Garmendia eta Gorpuzkingz trap taldea, gaur gauean, 'Autentikoak' saioan

Antzerkiak eta musikak bat egingo dute 'Autentikoak' saioan gaur gauean. Izan ere, Aitziber Garmendia aktorea, batetik, eta Gorpuzkingz trap taldea, bestetik, eseriko dira Pagadi eta Ferminen ondoan euren azken ordukoak kontatzeko.

Aitziber Garmendiak datorren abuztuan Jon Plazaolarekin batera estreinatuko duen Losers antzezlanari buruz hitz egingo du, eta, horrez gain, abian dituen beste lan batzuez ere mintzatuko da. Baina, aktualitateaz ez ezik, bere lanbideaz ere galdegingo diote Mikel Pagadik eta Fermin Etxegoienek, eta, seguruenik, Pagadik bere sekzio bitxietan parte hartzera gonbidatuko du Aitziber.

Gaueko bigarren gonbidatua Hondarribiko Gorpuzkingz taldea izango da. Zakil O’neil, Big Txiki eta Donald Trap musikariek osatzen dute talde berezi hori, eta musikaren bidez zabaltzen duten mundu-ikuskerak harrituta utziko du bat baino gehiago.

Saio berezi eta interesgarria gaur aurkeztuko dutena Pagadi eta Fermin gure 'autentikoek', 22:30ean, ETB1en eta eitb.eus-en.