18:00etan
John Andueza idazlea, gaur arratsaldean, "Biba Zuek!" saioan
EITB Media
Lehen orduan, euren seme-alabak komunikatzeko zailtasunak dituzten bi familia izango dituzte saioan.
John Andueza. EITB Mediaren bideo batetik ateratako irudia
Gaurko "Biba Zuek!" saioan John Andueza idazlea izango dute gonbidatu. Arrasate Press eta Arrasate Telebistan hasi zen kazetari lanetan, eta hainbat Rikardo Arregi Sari ere jaso zituen. Euskal Telebistan, aurkezle, aktore eta gidoilari ibili zen, besteak beste, eta hainbat film labur zuzendu ditu; baita idazle gisa hainbat liburu argitaratu ere. Maddalen Arzallusekin eta Xabier Sukiarekin bere ibilbide oparoaren errepasoa egingo du.
Lehen orduan, bi familia izango dituzte; euren seme-alabek, gaixotasun baten ondorioz, komunikatzeko zailtasunak dituzte, eta beraien komunikatzeko eskubidearen inguruan arituko dira. Izan ere, asko dira hitzik esateko gaitasunik ez dutenak, eta beste modu batzuetan komunikatzen dira. Horren garrantzia zein den eta nola egiten duten azalduko dute.
"Biba Zuek!" astelehenetik ostiralera da ikusgai, 18:00etatik aurrera, ETB1en eta eitb.eus-en.