Peru Abarrategi Arabako bertsolari txapelduna, gaur arratsaldeko "Biba Zuek!" saioan

Jokatu berri den Arabako Bertsolari Txapelketako txapelduna, Peru Abarrategi, izango da gaurko gonbidatua "Biba Zuek!" saioan. Aramaioarra umetan hasi zen bertso-eskolan ikasle; ondoren, Kuadrilla Artekoan, Aramaioko taldearekin, eta Arabako Eskolarteko Txapelketan ere garaile izan zen, 2013an eta 2014an. Duela zazpi urte hartu zuen parte lehen aldiz Arabako Bertsolari Txapelketan, eta, aurten, txapela etxera eramatea lortu du. Horretaz guztiaz hitz egingo du Maddalen Arzallus eta Xabier Sukiarekin.

Aurretik, saioaren lehen orduan, hipnosi klinikoaren inguruan arituko dira; izan ere, psikologian, terapia gisa erabiltzen da hipnosi klinikoa. Horretarako, alde batetik, psikologoa den aditu bat izango dute; bestetik, hipnosi klinikoa terapia gisa jaso duen erabiltzaile bat izango da platoan bere testigantza kontatzeko.

"Biba Zuek!" astelehenetik ostiralera dugu ikusgai 18:00etatik aurrera ETB1en eta eitb.eus-en.