Niko Etxart, Petti eta Liher, gaur gauean, "Bidegurutzean" saioan

Gaur gauean, Niko Etxart eta Petti musikariak eta Liher taldeko kideak sartuko dira "Bidegurutzean" saioaren telefono kabinan. Gonbidatu bakoitzari elkarrizketa bat egingo zaio bertan, eta kantu propio bat grabatuko du kabinan. Azkenik, hiru gonbidatuek bakoitzaren kantu bat abestuko dute elkarrekin.

Musika eta euskal musikariak ditu saioak ardatz saioak, Euskal Herriko hainbat musikariren elkargune izatea du helburu. Hala, musikari zein talde ezberdinak hurbilagotik ezagutuko ditugu, bidegurutzean kokatutako kabina baten barruan, Robert Johnsonen kondaira abiapuntu hartuta. Kondaira horren arabera, Johnsonek bidegurutze batean egin zuen topo deabruarekin, eta musikarako dohainen truke arima saldu zion hari.

Programaren atal bakoitzean hiru gonbidatu egongo dira (taldeak nahiz bakarlariak), adin, ibilbide eta esperientzia-maila ezberdinekoak. Lehen atalean, Izaro, Gari eta Skakeitan izan ziren protagonista nagusiak. Aste honetan, berriz, Niko Etxart, Petti eta Liher.

Robert Johnsonen kondaira

Kondairak dio bidegurutzeetako kabina bakartietan ezartzen dituela deabruak hitzorduak; eta kondairak dio Robert Johnson izan zela deabruarekin tratua egiten lehena, bidegurutzean. Deabruarekin hitzordua izan ostean, inoizko musikaririk onena bilakatu omen zen gauetik egunera.

Saioaren izena eta ideia Robert Johnsonen kondaira horretan oinarrituta dago. Izan ere, kondairaren arabera, Johnsonek bidegurutze batean egin zuen topo deabruarekin, eta musikarako dohain itzelen truke arima saldu zion hari.

Emanaldi berezia BECeko Bizkaia Arenan

Martxoaren 31n egin zen "Bidegurutzean" saioaren aurkezpena Barakaldoko BECen, Bizkaia Arena aretoan, musika ekitaldi itxurarekin. Programan parte hartu duten hainbat talde edo bakarlari izan ziren bertan. Zehazki, 20 talde edo bakarlari elkartu zituen aurkezpenak, guztira 45 bat artista, eta musika emanaldi berezi bat ere eskaini zuten. Saioaren webgunean ikusgai daude aurkezpenaren bideoak, eta baita ekitaldiaren laburpena ere.

"Bidegurutzean" saioa asteazkenetan izaten dugu ikusgai, 22:30ean, ETB1en eta eitb.eus-en.