Welter pisuko bi neurketa bikain, gaur gauean, "Boxeo Izarrak" saioan

"Boxeo Izarrak" saioak welter pisuko bi neurketa eskainiko ditu gaur gauean. Lehen borrokaldian, Jaron Ennis eta Bakhtiyar Eyubov arituko dira. Ennisek 22 urte besterik ez du, eta orain arte jokatutako 24 neurketak irabazi ditu. Boxeolari ikusgarria eta jotzaile gogorra da. Eyubov kazakhstandarrak, berriz, 14 borrokaldi irabazi ditu, bat galdu eta beste bat berdindu.

Bigarren norgehiagokan, Brian Mendoza eta Larry Gomez boxeolariek neurtuko dituzte indarrak. Mendozak 18 borrokaldi egin eta guztiak irabazi ditu, eta Gomezek hamarretik bakarra galdu du. Norgehiagoka parekatua eta zirraragarria izango da.

Azkenik, britainiarren arteko neurketa bat eskainiko du saioak, Troy Williamson eta Ben Douglas boxeolarien artekoa. Williamsonek 12 borrokaldi daramatza galdu gabe.

"Boxeo Izarrak" gaur gauean izango da ikusgai, 00:30ean, ETB1en.