'Burubero Derbia': Athletic ala Reala, nor izango da garaile?

Gaur asteartea, gaueko 22:00etan, 'Burubero' berezia izango da ikusgai: 'Burubero Derbia'. Athleticeko eta Realeko jokalariak izango dituzte lehian. Zuri-gorrien aldetik, Eneko Boveda eta Ainhoa Tirapu futbolariak arituko dira, eta aurrez aurre izango dituzte David Zurutuza eta Aintzane Encinas txuri-urdinak. Otsailaren 21ean mutilen taldeen arteko derbia jokatuko da San Mamesen, eta oraingoan 'Burubero' aurreratu egingo da.

Nork irabaziko duela uste duzu? Athleticek ala Realak? Sartu 'Burubero'ko lehiaketan eta eman zure iritzia! Gustukoen duzun taldearen kamiseta irabazi dezakezu!

Irabazitako dirua Sunakali proiekturako

'Burubero' berezi honetan 2.000 euro banatuko dira, eta diru hori Sunakali izeneko proiektura bideratuko da, hau da, zailtasun ugariko testuinguruan, futbolean aritzen diren Nepalgo umeei laguntzeko, hain zuzen ere. Bada, derbi berezi honetako irabazleek dirulaguntza hori emateko ohorea izango dute.

Saio berezi honetan, bestetik, Aurpegien atalean ere pertsonaia ezagunak izango dituzte, izan ere, Amets Arzallusek, Ilaski Serranok, Eneko Atxak eta Elena Iruretak egingo dizkiete galderak futbolariei.

'Burubero Derbia' gaur gauean izango da ikusgai, gaueko 22:00etan hasita ETB1en eta eitb.eus-en.