Ramon Agirre, Galder Perez eta Bas(h)oan musika taldea, 'EiTB Kultura Transit'en

Izen propioz beteriko saioa izango dugu ostegun gauean: Ramon Agirre, Galder Perez eta Bas(h)oan musika taldea protagonista 'EITB Kultura Transit'en.

Zineman, antzerkian eta telebistan ibilbide oparoa egin du Ramon Agirre aktore donostiarrak. Hiru pelikula estreinatu ditu azken hilabeteotan, eta esku artean dituen proiektuen zerrendan ez da etenik. Bere lanaz lasai hitz egin du Ramon Agirrek 'EiTB Kultura Transit'ekin.

Arratsaldero 'Graffiti' irratsaioa aurkezteaz gain, antzerkiak ere kentzen dizkio lanorduak Galder Perezi. Bilboko Anti liburu-dendan azaldu digu zeintzuk diren bere liburu kutunak. Horrez gain, zineman ikusi zuen lehen filmaz hitz egin digu, baita azkenaldian behin eta berriz entzuten duen musikaz ere.

Amaitzeko, eskarmentu handiko bi musikari izango dituzte protagonista aste honetako Sortzaileak atalean: Joseba Irazoki eta Beñat Achiary. Lehenengoa gitarra joaz, bigarrena kantuan eta Julen Achiaryren perkusioaz lagunduta, Bas(h)oan diskoa kaleratu du hirukoteak. Robbie Basho musikari amerikarra izan da proiektuaren abiapuntu eta inspirazioa. Gitarra jotzeko moduagatik egin zen famatu Basho, baina haren ahotsa ere omendu nahian, Irazokik Beñat Achiaryrengana jo zuen, ahots tinbre bertsua zutelakoan. Bashoren zenbait kantu berrinterpretatu eta beste batzuk sortu dituzte, disko esperimental bezain urratzailean.

'EiTB Kultura Transit' ostegun gauetan izaten da ikusgai ETB1en eta ETB2n.