ETB1en, ETB2n eta eitb.eus-en
'Sisiforen paperak' antzezlanaz, gaur gauean, "EiTB Kultura" saioan
EITB
Gainera, Getari Etxegarai aktorea, Aitziber Olaskoaga film ekoizlea eta Lukiek musika taldea gehiago ezagutzeko aukera eskainiko du saioak.
"EiTB Kultura". EITBren bideo batetik ateratako irudia
Gaurko "EiTB Kultura" saioak kultur arloko hainbat pertsonaia eta proiektu emango ditu ezagutzera. Batetik, Egunkariaren itxiera oinarri duen Sisiforen paperak antzezlanaz arituko da. Testua Harkaitz Canok sortutakoa da eta Fernado Bernuesek zuzendu du antzezlana. Egun, azken ukituak ematen ari zaizkie, beraz, saioak antzezlanaren eta azken zertzelada horien berri emango du.
Horrez gain, Getari Etxegarai aktorearen kultur proposamenak ezagutzeko aukera ere eskainiko da. Bilboko Pabellon 6an izan dira berarekin.
Bestalde, Aitziber Olaskoagaren ibilbidea ere emango du saioak ezagutzera bere azken lanaren aitzakiatan, Negu Gorriak musika taldearen inguruan sortutako Jo ta ke ikus-entzunezko proiektua.
Eta bukatzeko, Lukiek taldearen musikaz disfrutatzeko aukera ere eskainiko da.
"EiTB Kultura" saioa ostegunetan izaten da ikusgai, 23:15ean ETB1en eta 00:30ean ETB2n. Bi saioak eitb.eus-en bidez ere jarraitu ahal izango dira.