Bilboko jaiei buruzko "Ez Da Posible!" berezia, gaur gauean

Abuztua aurrera doa eta "Ez Da Posible!" saioaren hurrengo geldialdia Bizkaiko hiriburuan egingo dute. Gaur gauean, Bilboko Aste Nagusiari eta Marijaiari buruzko bilduma berezia izango da ikusgai 22:30etik aurrera ETB1n eta eitb.eus-en.

Azken lau hamarkadatan Bilboko festetan gertatu diren bitxikeriarik eta pasarterik onenak errepasatuko dituzte: zuzeneko istripuak, jaialdi eroak, zatarren lehiaketak etab… Ordubetez parrandan murgildu eta dibertitzeko aukera izango dute ikus-entzuleek. Horretarako, Bilboko Aste Nagusiko momenturik lotsagarrienak eta deserosoenak, dantzaldirik onenak eta kalean harrapatutako parrandazalerik arraroenak bilduko dituzte programan. Baita ETBko aurkezleek Bilbon bizitako une gogoangarrienak ere.

"Ez Da Posible! Marijaia", 22:30ean, ETB1en eta eitb.eus-en.