Jontxu eta Markel bakarrik eta galduta, gaurko 'Go!azen'en

Basakabi udalekua hustu egin beharko dute gaur gauean, 'Go!azen' telesailaren hirugarren atalean. Eta horretan dabiltzala, Jontxu eta Markel bakarrik geldituko dira eraikinean, besteek alde egin ondoren; bakarrik eta galduta.

Irati kokoteraino dago Zuzenek berarekin duen jarrerarekin; esperientzia gabekotzat jotzen du, eta ez ditu bere ideiak ontzat hartzen. Horrela, Peiok eta biek proba bat egitea erabakiko dute. Ondorioz, azkenean, larrialdi-simulakro bat antolatu beharko du Iratik.

Simulakro hori egiten ari direla, Jontxu eta Markel irten ezinik geratuko dira Basakabin. Bakarrik eta galduta geratuko dira udalekuan, eta zer-nolako iskanbila sortuko duten! Horrez gainera, Basakabin jendea gaixotu eta hiltzen duen birus lazgarri bat dabilela zabaldu da. Egia ote da? Arriskuan ote daude Jontxu eta Markel? Ala eurak izango dira bizirik iraungo dutenak?

Zurrumurruak zurrumurru, Elenek beste arazo bat dauka. Oso gustuko du Mikel, eta ez du amore eman nahi. Hori dela eta, Mikelekin hitz egin dezala eskatuko dio Haizeari, eta berarekin itzultzeko konbentzi dezala. Lortuko ote du Haizeak ahizpak esandakoa egitea? Mikelek bere sentimentuak kontatuko ote dizkio Haizeari?

Gaur, 21:00etan, ikusi ahal izango da 'Go!azen 3.0' telesailaren hirugarren atala eitb.eus-en eta ETB1en.