8. atala
Alex Basakabin agertuko da 'Go!azen'en gaurko atalean
EiTB
Dantzako irakasle gisa aurkeztu du bere burua Zuzenen aurrean, eta kobratu gabe lan egiteko prest azaldu da. Horrek Juleni eta Naiari eragingo die.
Your browser doesn’t support HTML5 video
Alex Basakabin agertuko da gaur, 'Go!azen 5.0' telesailaren zortzigarren atalean. Dantza irakasle gisa kontratatu du Zuzenek, eta horrek Juleni eta Naiari eragingo die.
Ezusteko ederra hartuko du Naiak Alex Basakabin ikustean! Ez daki zer egiten duen bera dagoen udalekuan. Julenek, ordea, Naia bereganatzeko asmoarekin joan dela susmatuko du, eta ez dio batere graziarik egingo. Naiarekin bikotea osatzea lortu duenean, bertan agertu zaio arerioa. Orain arte, nahikoa lasai zegoen Naiaren zalantzen aurrean, Alex Londresen zegoelako, baina orain...
Arrazoi du Julenek, gainera. Izan ere, Alex Naia bereganatzeko ahalegin guztiak egiteko prest dago. Horretara joan da Basakabira. Berak aurkeztu zion bere burua Zuzeni dantza irakasle gisa, eta dirurik kobratu gabe lan egiteko prest azaldu zen gainera. Argi dago borrokatzeko asmoz joan dela.
Bestetik, Amaiak eta Paulek lehenbailehen esan nahi diete Zuriri eta Eliri ezkontzeko asmoa dutela. Neskek badakite zer datorren, eta kosta ahala kosta saiatuko dira hori ekiditen. Aitzakia ugari jarriko dituzte euren gurasoekin elkartzea eta albistea jasotzea saihesteko, baina ez da erraza izango. Zer egitera iritsiko dira?
Halaber, iritsi da Basakabiko Olinpiadetako azken proba, bi taldeetako bat (Basakatuak edo Basahuntzak) garaile egingo duena. Jontxuk saiakera handia egin du pilotan jokatzen ikasteko. Anderrek asko lagundu dio, eta Eli izango du bikote. Emango ote dute fruiturik entrenamenduek? Izango al dira Jontxu eta Eli gai Gariren eta Aneren aurrean neurria emateko?
Ostiralero izaten da ikusgai 'Go!azen' telesailaren atal berri bat, 21:00etan, eitb.eus-en eta ETB1en. Aurreko atalak, berriz, EiTB Nahieran atarian daude ikusgai.