Elik eta Naiak une deserosoak biziko dituzte gaur gauean 'Go!azen'en

'Go!azen'eko gaurko atalean Eli eta Naia ez dira oso eroso egongo. Bakoitzak bere arazoak ditu eta, gainera, Aneren argazkiaren kontuarekin zipristinduta daude. Bien bitartean, Zuzenek loteria tokatu zaiola pentsatuko du.

Egun hauek ez dira udalekuan igarotzen ari diren onenak Elirentzat eta Naiarentzat. Oraindik ez da argitu Aneren argazkia nork zabaldu zuen. Aneren ustez, beraiek izan ziren eta ez ditu aurrean ikusi ere egin nahi.

Hori gutxi balitz, Naia erabat nahastuta dago. Alexek gero eta denbora gehiago pasa nahi du berarekin eta zinemara gonbidatuko du. Julen ere ondoan izaten du askotan... Ez daki nola portatu beraiekin.

Elik, berriz, hasierako helburua lortu du. Momentuz, Zurik eta biek lortu dute Paulen eta Amaiaren ezkontza atzeratzea. Baina ez dira oso ondo sentitzen; Amaiari bideoa grabatu eta bidaltzea ez zen erabaki ona izan. Gariren babesik ere ez du Elik gaixoak kontu honetan; kontrara, APPko elkarrizketan argi utzi dio ez zuela ongi jokatu.

Jontxuk eta Anderrek gero eta denbora gehiago pasatzen dute elkarrekin. Ondorioz, Markel bakarrik gelditzen da nahi baino gehiagotan eta nahikoa triste dago. Jontxu galdu duela pentsatzea ere iritsiko da. Onartuko al du bere txikitako lagun-minak daukan harreman berria?

Zuzenek, ostera, loteria tokatu zaiola dioen mezua ikusiko du tabletean eta pozak zoratzen dabil. Dirua xahutzen ere hasiko da: auto-lasterketen jokoetan aritzeko aulki berezi bat ere erosiko du!

Ostiralero izaten da ikusgai 'Go!azen' telesailaren atal berri bat eitb.eus-en eta ETB1en, 21:00etan. Aurreko atalak, berriz, EiTB Nahieran atarian daude ikusgai.