Eiderren dantzarako zapatilak hartuko dituzte 'guay'ek gaur 'Go!azen'en

'Guay'en eta 'friki'en arteko tirabirak areagotu egingo dira Basakabin 'Go!azen' telesailaren gaurko atalean. Eiderren dantzarako oinetakoak ostuko dituzte beste taldekoek, eta ez dira ados jarriko ezta ikusi behar duten filma aukeratzen ere.

Amaiak pelikula bat ikustea erabakiko du udalekuko ekintza gisa eta ikusi nahi dutena erabakitzeko aukera emango die ikasleei. Baina desastre hutsa izango da eta ez dira ados jarriko. Gainera, Igorrek emanaldia saboteatuko du.

Horrez gain, frikien taldea pixka bat izorratzea pentsatuko dute, eta Eiderren dantzarako zapatilak ostuko dituzte. Non agertuko ote dira?

Bien bitartean, Eneko emanaldirako entseguak espiatzen arituko da. Baina Zurik harrapatu egingo du, eta mutila zalantzan dagoela irudituko zaio. Beraz, parte hartzeko gonbidapena egingo dio berriz ere.

Enekok eta Maddik Basakabin ez dutela bakarrik egoteko aukera handirik uste dute, June beti gainean baitute. Horren aurrean, Aimarrekin hitzordu bat prestatuko diote Juneri, bikotetxoa pixka batean bakean utz dezan.

Hori guztia, gaur, 21:00etan, ETB1en eta eitb.eus atarian, eta, ondoren, baita Go!azen APPan eta EiTB Nahieran zerbitzuan ere.