Garazi ikusteko asmoz Basakabira joango da Eli "Go!azen 9.0"ren bigarren atalean, gaur gauean

"Go!azen 9.0" telesailaren bigarren atala izango dugu ikusgai gaur, 21:00etan, ETB1en eta eitb.eus-en. Bertan, Eli Basakabira sartzen saiatuko da Garazi ikusteko asmoz, baina ahaleginak alferrikakoak izango dira. Bestalde, Oier Barahona zuzendariaren neurri zorrotzak direla-eta, zarata-protesta egingo dute udalekuko gazteek.

Ohi denez, musikak presentzia nabarmena du telesailean. Aste honetan protagonistek dantzatuko dituzten kantuak dira: ETSren "Aurkitu genituen" eta Merina Grisen "Saiatzen naiz".

"Go!azen"en estreinaldia, joan den ostiralean, eguneko saiorik ikusiena izan zen Euskadi 4-12 urte bitarteko gaztetxoen artean, % 43,0ko audientzia zatiarekin. Halaber, 53.000 ikus-entzuleko audientzia metatua lortu zuen Euskadin eta eragin eremuan, eta % 9,0ko kuota euskaldunen artean.