Manex shock egoeran dago, Erikaren sekretua jakin ostean

Manex shock egoeran ikusiko dugu 'Goenkale telesailaren hurrengo atalean. Inoiz ez zitzaion burutik pasa Erika gizonezko baten gorpuan harrapatutako emakumea izan zitekeenik. Eta honek bere sekretua erakutsi dionean, egoera gainditu ezinean utziko du. Erika berarekin kontaktuan jartzen saiatuko da, baina Manexek ezingo dio aurre egin.

Hala ere, ez da hori 'Goenkale'ko pertsonaiei gertatutako tragedia bakarra. Izan ere, Arraldeko alde zaharreko etxebizitza bat goitik behera etorri da eta zaurituak eta kalte materialak sortu ditu. Horren ondorioz, elkartasuna handitu da eta herritar guztiak kaltetuei laguntzeko prest daude, Fundaziotik hasi eta Boga tabernaraino. Baita Sabin ere. Bere lagun Asierren etxea eroritako eraikinean zegoen eta orain etxean hartuko du.

Bestalde, Kandidori gertakizun honen ondoren Ertzaintzak egindako ekimena koordinatzea tokatu zaio. Lan ona egin du eta Mitxelek komisario-orde izendatuko du, guztien sorpresarako.

Bere emazte-ohiari, Aliziari, gauzak ez doazkio hain ondo. Alde batetik, Naiak ez duela Afrikatik itzuli nahi jakinaraziko die. Eta bestetik, Telmo azalduko da berriz ere, Aliziaren barruko sua piztuz.

Azkenik, Coralinak ere arazoak ditu. Haurdun dago; isilean mantentzen saiatu da, baina azkenean Gariri kontatzea erabaki du. Eta honen erantzunak ezustean harrapatuko du gazte kolonbiarra.

22:25etan egongo da ikusgai gaur 'Goenkale' ETB1en eta eitb.com-en zuzenean.