Amaliaren sekretuetako bat ezagutuko dugu gaurko 'Goenkale'n

Etxegarai familia eta ingurukoak ezagutzen jarraituko dugu aste honetan "Goenkale"n. Gaur gauean, Amalia amonaren beste sekretu bat jakingo dugu. Arantzaz aparte seme bat du, baina aspaldi alde egin zuen Arraldetik. Zergatik izan ote zen? Nolako harremana dute gaur egun?

Izaskun ere azalduko da Etxegaraitarren bizitzan. Arantzaren aspaldiko laguna da, baina 15 urte haserre eta elkarri hitzik egin gabe egon dira. Orain, estuasunak bizi ditu Izaskunek, eta laguntza eskatu beharko dio Arantzari.

Inesek ere ez du une gozoa bizi. Ernestok, aitak, Unai biloba ikusten jarraitu nahi du. Horren ondorioz, erabaki sendo bat hartuko du Inesek, eta ezusteko bixita bat egingo du.

Bestalde, Lupek eta Sabinek amaitu dute eztei-bidaia eta Arraldera itzuli dira. Orain, ordea, Luperekin bizitzera doala esan beharko dio Sabinek Axuni, eta ez daki nola esan, ez baitaki nola hartuko duen izebak. Gozoa jartzen da horrelakoetan Axun!

Arraldera itzuli den beste bat Nekane da. Mitxelen afera argitu ondoren, komisario postua itzuli diote. Lehendabiziko kasua Barbararena izango da. Kandidoren ustez, Interpol Barbararen bila dabil eta ikertzeko baimena eskatuko dio Nekaneri.

Gaur, 22:15ean egongo da ikusgai "Goenkale" ETB1en, eta baita eitb.eus-en ere, zuzenean.