Amaia, Ikerren neska-laguna platoan azaldu da!

Iker Ordorikaren neska-laguna, Amaia, 'Gu Ta Gutarrak' saioko platoan azaldu da, Ikerri sorpresa itzela emanez. Bere mutila nolakoa den azaldu du Julen Telleriak gidatzen duen programan.

'Gu Ta Gutarrak' saioko lehen atal hauetan ikusi dugunez, Iker, Gernikako mutila, ez da besteak bezain saltseroa, eta apur bat gehiago kostatu zaio taldeko dinamikara egokitzea; diskotekako musika gustatzen ez zaiola eta, aparte xamar ibili omen zen gainerakoek Morgako aterpetxean egin zuten festan. Eta ondoren, platoan trikitixaren doinuan dantzarazi nahi izan zioten, baina lotsa ematen zion. Azkenean, taldekideek kuadrillatik irteteko boto gehien berari eman zizkioten eta kolokan dago.

Baina gaurko programan tristurak ahaztu ditu; bere neska-laguna, Amaia, platoan azaldu da eta sorpresa polita eman dio. Bost urte baino gehiago eman omen dute elkarrekin eta oso maiteminduta daude; Ikerrek bere argazkia eraman zuen aterpetxera eta lehenengo egunetik hitz egin zien gainerakoei Amaiari buruz.

Iker espontaneoa eta dibertigarria dela esan du Amaiak, eta, pixka bat jeloskorra bada ere, ez du arazorik izan 'Gu Ta Gutarrak' saioa dela eta.