Asier Olaizola izango da gaurko gonbidatua 'Gure Kasa' saioan

Sagardo denboraldiaren hasiera ospatzeko, kirolari eta sagardogile bikain bat gonbidatu dute gaur 'Gure Kasa' saiora: Asier Olaizola goizuetarra. Pilota munduan, Olaizola I.ak binakako bi txapelketa irabazi zituen eta 2013ko abenduan eskegi zuen gerrikoa. 2006tik, Olaizola sagardotegiaren jabea da, eta bertan egiten du lan buru-belarri.

Horren irudi bitxi eta ikusgarriak aurkitu ditu Nerea Aliasek ETBko artxiboan, Jon Garatek sagardoa botatzeko abilezia neurtu du kalean, eta Nahiara Gagok urarekin txotx egiten jarriko ditu aurkezleak eta gonbidatua.

Maddalen Arzallus Hitzen zaindaria Olaizolaren jaioterrian izan da, Goizuetan, bertako hitz eta esamolde zaharrak ezagutu eta ikasteko, eta Iban Garcia youtuberrak modako challenge bat aurkeztuko digu, Baby shark challengea.

'Gure Kasa' astelehenetik ostegunera izaten da ikusgai ETB1en eta eitb.eus-en, 21:30ean.