Erabatera musika-taldea izango da gaurko gonbidatua 'Gure Kasa' saioan

Musikari bikainak ekarriko dituzte gaur gauean 'Gure kasa' saiora. Sortu berria den Erabatera taldea izango dute gonbidatu: Gaizka, Jurgi, Mikel eta Beñat. Urte asko daramatzate musika egiten. Gaizka eta Mikel Gatibu taldeko bateria-jotzailea eta baxu-jotzailea dira, Beñat Ken Zazpi taldeko gitarrista da, eta Jurgi, berriz, Willis Drummond taldeko ahotsa. Beraien abesti berriak aurkeztu, talde berriaren nondik norakoak azaldu eta ondo pasatzeko gogoz datoz gure saiora.

Jon Gotzon Aldaparenak, Dagoenean bon-bon tartean, galdera azkar eta dibertigarriak egingo ditu gonbidatuak hobeto ezagutzeko, Nahiara Gagok oreka eta abilezia lantzeko jolasa ekarriko du, eta Iban Garcia youtuberra momiaz mozorrotu eta sustoak ematen ibili da kalean.

Maddalen Arzallus Abestien zaindaria Tolosako inauterietan murgilduko da. Mozorroek eta abestiek kaleak hartuko dituzte datozen egunetan, eta prestakizunak hasi dira.

'Gure Kasa' astelehenetik ostegunera izaten da ikusgai, 21:30ean, ETB1en eta eitb.eus-en.