'Herri Txiki, Infernu Handi' Donezteben, gaur gauean, ETB1en

Nafarroara gerturatuko dira Zuhaitz eta Pagadi gaur, Doneztebe herrira. Malerreka eskualdearen hiriburua da Doneztebe, Bidasoa ibaiak zeharkatzen duen herri polita.

Zuhaitzek Donezteben ospe handia duten kanutillo goxoak prestatzen dituen emakume bat ezagutuko du eta haren sukalderaino sartuko da mila konturi buruz hitz egitera. Sukalde batetik, jostun baten etxeko salaraino. Doneztebe, Malerrekako hiriburua izanik, denda eta negozio ugariko herria izan da beti, eta jostunek lan asko egin dute herrian. Zuhaitzek jostun horietako bat ezagutuko du eta bere etxeko saloitxoan solasaldi polita izango du berarekin. Jostungintzaz ez ezik, Cométe Sare ospetsuari buruz ere solastuko dira, izan ere, jostunaren aita Bigarren Mundu Gerran sortu zen sare horretako kide izan zen. Doneztebeko eskolan izango du hurrengo parada Zuhaitzek. Ikasleak eskolatik ateratzeko orduan, autobusen sarrera eta irteera gobernatzen ibiltzen den kontserjea ezagutuko du. Herrian ingeles akademia duen emakume kaliforniarra eta haren gizonarekin ere egongo da eta herritik gertu, Oteiza auzoan, senide askodun familia jator bat ezagutuko du.

Pagadik astoak maite dituen eta bere baserrian kiwiak hazten dituen doneztebetar gazte bat ezagutuko du. Haren baserrira astoaren gainean joango da. Rallyetan kopilotu lanak egiten dituen neska gazte bat ere ezagutuko du, eta herri inguruko bideetan ibiltzera joango dira Pagadik piloto lanak eginez. Muxu Beltza musika taldeko kantaria ere ezagutuko du Pagadik. Kalean topatuko du buruan txapela berezia jantzita duela eta haren etxera gerturatuko da bere txapela bilduma ezagutzera. Doneztebe gurutzatzen duten erreken inguruan ere solastuko da bertako bi gizonekin eta amaitzeko, kantu giro alaiean topatuko ditu hainbat herritar hango ohitura den Aurorak delakoa entsaiatzen.

'Herri Txiki, Infernu Handi' gaur gauean emitituko da, 22:00etan, ETB1en.