'Herri Txiki, Infernu Handi' Lizartzan izango da, 22:00etan

Gipuzkoako Lizartza herrira egingo dute txangoa gaur Zuhaitzek eta Pagadik 'Herri Txiki Infernu Handi' saioan. Nafarroara dijoan errepide zaharrak zeharkatzen du herria eta horregatik, urtetan, Gipuzkoa eta Nafarroa arteko igarobidea izan da Lizartza. Bestalde, Insalus ura Lizartzan botilaratzen da eta urak garrantzia handia du herriaren ekonomian. Ezaugarri hauek saioaren harietako bi osatuko dute.

Pagadik aiton-amona bikote jator bat ezagutuko du herrira iritsi bezain laister. Kanpoan hotza eta euria denean, etxeko garajean paseatzeko ohitura du bikote horrek eta Pagadik bueltaxka batzuk egingo ditu haiekin. Ondoren, amonak, bere sorlekua izan zen baserria zegoen tokira eramango du Pagadi, Intsalus baserria zegoen tokira hain zuzen. Insalus ura eta iturburu natural batetik datorren uraren arteko kata berezia ere egingo du Pagadik, zein den zein asmatu nahian. Etxean Lakasitos izeneko dortoka bitxi bat duen bikote bat ere ezagutuko du, eta baita ere herrigunetik kilometro batzutara lagunentzako elkarte elegantea duen gizon bat. Komuna lur azpian du, eta elkartera sartzeko, sirenadun ate berezia zeharkatu behar da.

Zuhaitz, hamaiketakoaren ordua iritsi, eta tripazorriak jota, mokadutxoa eskatuko dio etxeko atarian topatuko duen emakume bati. Egunero herriko banku berdinean eseritzen den agure hirukote bat ezagutuko du. Haiekin solasean arituko da txapelaren garrantziaz, eta beste mila konturen inguruan. Goilareei erabilpen berezia ematen dien emakume batekin barre egingo du Zuhaitzek, eta herriko taberna batean, atzerako kontaketa etengabean dabilen erloju baten istorio bitxia ezagutuko du. Kaxianok Lizartzarekin zuen lotura estua ezaguna izanda, bere lekutxoa ere izango da herri txiki honetan. Amaitzeko, musika instrumentu deigarria sortu duen lizartzar batekin eta haren lagun taldearekin kantu giro alaiean amaituko du eguna Zuhaitzek.

'Herri Txiki, Infernu Handi' 22:00etan izango da ikusgai eitb.eus-en eta ETB1en.