Abaltzisketan izango da gaur 'Herri Txiki, Infernu Handi'

'Herri Txiki, Infernu Handi' saioan, Txindokiren babesean dagoen Abaltzisketa herri txikira joango dira gaur Pagadi eta Zuhaitz. Tolosaldeko herritxo honetan, 319 lagun baino ez dira bizi paisaia eder eta orlegi baten erdian.

Eguna hasteko, Zuhaitzek herriaren erdian dagoen enpresa berezi bati bisita egiten dio. Txundigarria bada ere, Txindokiren itzalpean, enpresa askori zerbitzu ematen dien call-center moderno baten egoitza dago Abaltzisketan. Gero, herri-gunetik urrundu eta egunero- egunero Larraitz auzoan elkartzen diren lagun koadrila batekin arituko da espazioko misterioei buruz. Bere baserriko atarian artilezko galtzerdiak egiten orduak ematen dituen amona jator bat ere ezagutuko du, eta beste baserri batean, txerriak eta basurdeak gurutzatuz, txerri-basurdekume piloa dituen familiarekin egongo da. Amaitzeko, zaldi zahar eta gaixoak zaindu eta ostatu ematen dien abaltzisketarra ezagutuko du.

Pagadik herriko apaiza argazkiak egiten harrapatuko du herriaren gainaldean dagoen ermita batean. Abaltzisketan ez ezik, beste hamaika herritan ematen ditu mezak apaiza horrek, eta gai horren inguruan solastatuko dira, besteak beste. Herriko alkateak, berriz, herriko whassapp taldeari buruz hitz egingo dio. Udalak ere aplikazio hori erabiltzen du herritarrei interesgarriak izan dakieken albisteak zabaltzeko, eta Pagadik whassapp taldean sartzeko eskatuko dio alkateari.

Herri-gunetik oso urruti dagoen baserri batean, senar-emazte bikote jator bat ezagutuko du Pagadik. Emaztea ingelesa da eta senarra, judoan aditua. Pagadi, baserriko ganbaran hainbat judo ariketa zuzen egiten saiatuko da. Ondoren, ur-bilatzaile edo zahori bat ezagutuko du. Metalezko bi makiltxoren laguntzarekin, lurrazpiko ura aurkitzen saiatuko da Pagadi. Egunean zehar herriko whassapp taldea bero bero izango da, eta bertako mezuen bidez izango du bi abaltzisketarren arteko apustu bereziaren berri.

'Herri Txiki, Infernu Handi' gaur emitituko da, 22:00etatik aurrera, eitb.eus-en eta ETB1en.