'Korrontzi Dantzan' Bermeon izango da gaur gauean

'Korrontzi Dantzan' saioa Bermeora joango da gaur gauean. Agus Barandiaranek gidatutako taldeak emanaldia eskainiko du herrian, eta bertako dantza taldeekin koreografia desberdinak landuko ditu. Hori izango da dantzari amateurren erronka nagusia: Korrontzi taldearen koreografiak dantzatzea, herri osoaren aurrean.

Erronka betetze aldera, Agus Barandiaran arduratuko da trikitixarekin koreografiei doinua jartzen, eta Izaskun Iturri dantzariak erakutsiko dizkie koreografien oinarrizko urratsak herritarrei.

Emanaldia prestatu bitartean, dantzarekin zerikusia duten profil ezberdinetako protagonistak ezagutuko dituzte. Horien bidez, emanaldiaren aurretiko entseguetan murgildu eta dantzari bakoitzaren eboluzioan zentratuko dira.

Ikuskizunaren egunak presentzia nabarmena izango du, oholtza gaineko jardunaz gain, backstagean sortzen diren emozio guztiak ikusteko abagunea izango baita.

'Korrontzi Dantzan' gaur izango da ikusgai 22:00etan ETB1en eta eitb.eus-en.