'Pintxo & Pote' Algortan izango da gaur gauean ETB1en eta eitb.eus-en

Gaur gauean,'Pintxo & Pote' saioan, Asier Hormaza eta Andoni Agirregomezkorta Getxoko Algorta auzora joango dira Josema Azpeitiak modu berezi batean agindu dien misioa betetzera. Ongietorri beroa emango diete Portu Zaharrean, aurresku eta guzti!

Andoni Salem tabernara abiatuko da lehenengo. Bertan, jabeetako batekin, Ekain Gonzalez de Mendibilekin, egongo da eta, nola ez, pintxo bat egingo dute.

Asier, bitartean, Satistegi tabernara joango da. Hantxe, Aitor jabe xelebrearekin egongo da, eta pintxo bat egingo dute, Irati Alonso sukaldariarekin batera. Asierrek ez du Satistegi bertako koktel famatuak nola egiten dituzten ikusi gabe utziko, Kike Llorentek bat prestatuko baitio.

Gero, Endika Guarrotxena futbolari ohiarekin egingo du topo Andonik, eta Lander Labajoren baratze ekologikoa bisitatuko dute. Rozio Luces ezagutuko dute bertan. Ondoren, Baster tabernara joango dira Labajorekin, tortilla erraldoi bat egitera. Jon Goikuria zerbitzaria eta Ander Unamuno sukaldaria izango dira bertan.

Asierrek, Algortakoa izanik, Arkaitz Landeta sukaldariarekin eta Frantxi Kiskillon arrantzalearekin egingo du topo kasualitatez. Imanol txistulariari ihes egin nahian aurkituko ditu.

Arkaitzekin eta Frantxirekin arrantzan joango da gure aurkezlea, eta harrapatutakoa Unai tabernan prestatuko dute.

Andoni, postrea jateko edo, Etxetxu Berria tabernara joango da, Natalia Gomez jabearekin eta Raquel Canta langilearekin kafe bereziak nola prestatzen diren ikastera.

Algortako tabernak pintxo-poterako prestatzen ari diren bitartean, Asier Burdinola taberna ezagunera sartuko da, eta pintxo bat egingo du Aitor Asenjo eta Sarai Gaztañaga sukaldariarekin.

Asier eta Andoni batutakoan, Saniko tabernaren inauguraziora joango dira, eta Iker Galartza, Gorka Iraizoz, Reyes Prados, Patxi Salinas eta Alex Sardui aurkituko dituzte han.

Amaieran, pintxo-poteari ekingo diote, tabernaz taberna, eta Biotz Alai abesbatzarekin egoteko aukera ere izango dute.

'Pintxo & Pote' asteazkenetan izaten da ikusgai, 22:15ean, ETB1en eta eitb.eus-en.