15:00etan
Xabier Montoiari elkarrizketa, gaurko 'Sautrela'n
A.H.
EITB
Gainera, gidoigintza eta literatura alderatuko ditu literatura saioak, 15:00etan, Hasier Etxeberriak aurkeztuta.
Aste honetako 'Sautrela' saioak Xabier Montoia idazlea izango du gonbidatu nagusi. Gainera, gaur 15:00etan ETB1en ikusgai izango dugun saioan gidoigintza eta literatura alderatuko ditu Hasier Etxeberriak Izaskun Arandia gidoigilearekin eta Harkaitz Cano idazle eta gidoigilearekin.
Xabier Montoia (Gasteiz, 1955) izango dute 'Sautrela'n. Literaturan ibilbide luze eta oparoa duen idazlea izanagatik, lehenengo aldia da telebistan izango dela, orain arte beti uko egin baitio elkarrizketak emateari. Bere azkeneko nobelaren karietara izango dute: Azken afaria. Felix Goñi protagonistaren hondamendia azaltzen du eleberriak, lau zati aski ezberdinen bidez harilkatua dagoena. Neurri batean, Euskal Herriaren aurreko hamarkadaren erretratu politiko-soziala ere bada: atxiloketak, epaiketak, laguntasuna, traizioa… Montoiaren literaturgintzan usu topatu izan ditugun gaiak aurkituko dituzte irakurleek azkeneko lan honetan.
Bestalde, Hasier Etxeberriak gidoigintza eta literatura alderatuko ditu Izaskun Arandia gidoigilearekin eta Harkaitz Cano idazle eta gidoigilearekin. zinema eta telebistaren sorreraz geroztik gidoigintza ikus-entzunezko industriaren zati garrantzitsu da ezbairik gabe. Baina zenbat du literaturatik gidoigintzak? Ezagun da idazle handi ugarik lan egin izan dutela gidoigile moduan, horien artean, Francis Scott Fitzgerald, Ernest Hemingway eta Raymond Chandler. Esan daiteke, gainera, gaur egun gidoigintzak halako loraldi bat bizi duela, azken urteetako telesail estatubatuarren eskutik, batez ere ('The Wire', 'The Sopranos', 'Breaking Bad'...). Serie horietako batzuetan gidoigilea izar izatera iritsi da ia. Halako zerbait gertatzen ari ote da gure artean ere?
Beñat Sarasolak Azukrea belazeetan ipuin liburua ekarriko du gogora. Inazio Mujikak oso gazterik idatzi zuen liburu gogoangarri hori, 1987an. Garaiko giro literarioa aski ongi islatzen duen liburua da besteak beste, orduan boladan zegoen errealismo magikoaren eraginpekoa baita hein handi batean.
'Sautrela' gaur emitituko da 15:00etatik aurrera ETB1en.