Luis Garcia Montero poeta, gaur, 'Sautrela'n gonbidatu

Gonbidatu oso berezia izango du 'Sautrela' saioak aste honetan: Luis García Montero poeta espainiarra. Bere belaunaldiko poeta nabarmenetako bat da, zalantzarik gabe, 'esperientziaren poesia' deitutakoaren edo poesia errealistaren barruan kokatu ohi dena. Literaturako irakaslea ere bada, Granadako Unibertsitatean, eta literatur kritikari lanetan ere ibilia da. Eztabaida sutsuak eduki izan ditu poesiaren inguruan, eta oso kritiko agertu izan da poesiaren joera esperimental muturrenekoekin.

20 urte bete dira bere lan ezagunena, Habitaciones separadas, argitaratu zuenetik, eta, hori dela eta, obraren berrargitarapen berezi bat atondu dute, non poema originalak beste poeta eta kritikarien iruzkinez lagunduta datozen. Liburuaren karietara bere obraren errepasoa egiteko eta poesiaren inguruan dituen ideiak azaltzera etorriko da aste honetako 'Sautrela'ra, eta Hasier Etxeberriak, besteak beste, Espainiako egungo poesiaren inguruan zer pentsatzen duen galdetuko dio.

Erreportajean, ezohiko bi esparru jorratuko ditu: literatura eta zientzia. Sarritan bi eremu oso bereizitzat jotzen ditugu, elkarrekin harremanik ez bailuten. Aitzitik, ezertan lagun al dezake zientziak literatur ikerketan? Zer esaten digu zientziak, eta bereziki neurozientziak, irakurtzeko prozesuaren edo sormen prozesuaren inguruan? Mestizajes izeneko jardunaldi batzuk antolatu dira berrikitan Donostia International Physics Center-en, non zenbait adituk bi esparru horien arteko gaiak landu dituzten. Hala, jardunaldiotara gerturatu eta Itziar Laka hizkuntzalariarekin eta Clara Martin ikertzailearekin izango da 'Sautrela'.

Azkenik, Beñat Sarasolak gure idazle aktibo estimatuenetako baten lehen nobela gogoraraziko du: Pello Lizarralderen E Pericoloso Sporgersi.

'Sautrela' gaur izango da ikusgai, 15:00etatik aurrera, ETB1en.

ng>