Ibai Iztuetari elkarrizketa, gaur, 'Sautrela' saioan

Beste urtebete osatu dutelarik, aste honetan izango da kurtso honetako azkeneko 'Sautrela' saioa. Bertan, Ibai Iztuetaren saiakera berria izango dute mintzagai: Cultura vasca versus euskal kultura. Euskal kulturaren inguruko testua da, haren mugak zedarritzea helburua duena, besteak beste. Gai zaharra da inondik ere: zerk bereziten dute euskal kultura eta cultura vasca? Hizkuntza al da irizpide bereizlea? Zer da Euskal Herrian erdaraz egiten den kultura? Nola harremantzen dira bi esparruak? Ez dira nolanahiko galderak, kulturaren erroak aztertzen ditu eta azken batean. Ikerketaren ondoren lortu dituen ondorioak azalduko ditu Iztuetak.

Bestetik, hil berri den idazle bati buruzko erreportajea izango dute. Joan den apirilean hil zen Lübeck herrian Günter Grass, XX. mendeko bigarren erdiko idazle alemaniar handienetakoa. Batez ere Latorrizko danborra nobelagatik egin zen ezagun mundu mailan, eta 1999an Literatura Nobel Saria eskuratu zuen. Petra Elser itzultzailearekin eta Joxemari Iturralde idazlearekin batu dira Grassen inguruan gehiago jakiteko.

Azkenik, Beñat Sarasolak Harkaitz Canoren liburu bati buruz hitz egingo du, Piano gainean gosaltzen kronika liburuari buruz. 2000. urtean argitaratua, Canok aurreko urtean New Yorken eman zituen zortzi hilabeteen kronika da liburua, kronika huts eta hotzari itzuri egiten diona.

Ohiko legez, 'Sautrela' gaur izango da ikusgai, 15:00etatik aurrera, ETB1en.