'El euskera, referente mundial', gaurko 'Tribuaren berbak' saioan

Gaur gauean 'Tribuaren Berbak' saioan hizkuntzen sailkapenean euskarak duen lekua argituko digu Reyes Pradosek. Lur planetan, zazpi mila milioi lagun baino gehiago bizi gara; norbera bere sentimendu, ideia eta sinesmen propioekin. Eta komunikatzeko, hainbat hizkuntza erabiltzen dugu; zazpi mila bat mundu osoan, tartean, gure euskara.

Itziar Laka hartuko dute gonbidatu lehenik eta behin. EHUko katedradunak aniztasun soziolinguistikoaren esanahia eta garrantzia azalduko du. Euskarak munduko hizkuntzen artean betetzen duen lekuaz dugun ikuspegia ere izango du mintzagai. Ondoren, ETB2ko kamerak kalera irtengo dira biztanleen iritzia jasotzeko asmoz.

Josu Waliñorekin ere solastatuko dira. PuntuEUS fundazioko presidenteak euskarak Interneten eta sare sozialetan duen presentziaz berba egingo du.

Bestalde, Basque Center on Cognition, Brain and Language (BCBL) ikerketa guneko Jon Andoni Duñabeitia kideak gaur egun abian dituzten proiektuak aurkeztuko ditu. Hizkuntza bat baino gehiago menperatzeak gure burmuinean zelan eragiten duen azalduko du gainera.

Eusko Jaurlaritzako Hizkuntza Politikarako Sailburuorde Patxi Baztarrikak hizkuntza ezberdinen arteko bizikidetza aztertuko du. Gaur egun burutzen dituzten programen eta kanpainen gainean hitz egingo du.

Atal honetan, Garabide elkartearen lana ezagutuko dute ikus-entzuleek. Kooperazio era berria egiten duen elkartea da Garabide, esperientzien elkartrukean oinarritzen den lankidetza. Maddi Iñarraren eskutik jakingo dugu euren egitasmoen berri.

Soziolinguistika Klusterreko kide Belen Urangak, bere aldetik, gaur egungo hizkuntzen bizitasunaren inguruko ikuspegia luzatuko du; eta euskararen egoeraz ere arituko da.

Amaitzeko, Kirmen Uribe idazleak eta euskararen enbaxadoreak, bere bizipen pertsonak eta pasadizoak ekarriko ditu saiora.

Hau guzti hau, beti ere, umorea, datu bitxiak eta kontakizun harrigarriak  tarteko direla.

'Tribuaren Berbak' gaur gauean emitituko da, 20:00etatik aurrera, ETB2n.

trong>n.