Irrintzilariak 'Zuek hor eta gu hemen' saioan

'Zuek hor eta gu hemen' irrintzika etorriko da gaur arratsaldean, gonbidatu bereziekin. Astelehenean irrintzi txapelketa jokatu zen Urnietan, eta Nerea Arriaga (helduen mailan) eta Eneka Iribarren (haurren mailan) izan ziren garaile bertan. Biak izango ditugu gonbidatu saioan, eta euren irrintziak botatzeko truko eta abileziak erakutsiko dizkigute.

Aurretik, ordea, Anjel Alkainek eta Iker Galartzak gidatuta, eguneroko albistegi bitxia izango dugu. Egunkari zein albistegiek zabaldu ez dituzten albisteak kontatuko dizkigute, umorez.

Agurne Anasagastik gidatuko du tertulia garaia, eta Haritz Gallastegi (Euskadi irratiko kirol esataria), Nagore Osoro (Zumaiako arraun taldeko patroia) eta Manu Maritxalar izango ditu mahai inguruan. Hirurak kirolak izanik, kirol ohiturez eta korrika egiteko modu bitxiez solastuko dira. Eta zuek zer ohitura duzue? Eman zuen iritziak saioaren webgunean!

Maria Amolategi kantari eta musikaria musikaz hitz egitera etorriko zaigu, eta ez galdu saioa, abesti ezagun bezain bitxia abestuko baitu gure aurkezle eta tertuliakideekin batera!

Jon Urbieta ere platoan izango dugu ikus-entzuleekin harremanetan, zuzen-zuzenean! Zer kirol praktikatzen duzue? Futbola, pilota, tenisa, surfa… edozeinek balio digu! Igo ezazue sare sozialetara zuen argazkia kirola egiten eta #zuekkirolari etiketa erabili!