Nakor eta Amaia zirikatzaileak, gaur, 'Zuek hor' saioan!

Amaia Artetxe izango dugu "Zuek hor eta gu hemen" saioan. Telebistako saio berriak, txutxumutxuak, tendentziak… denetarik kontatzen digu! Oraingoan "Gu ta gutarrak" realityko txutxumutxuak kontatuko dizkigu, eta horretarako saioan zirikatzaile lanak egiten dituzten Nakor eta Amaia etorriko dira gonbidatu.

Aurretik, ordea, Nuntzeberry atalarekin hasiko da saioa. Gaur Egunek baztertu dituen albisteak erakutsiko dizkigute Anjel Alkain eta Iker Galartzak. Eguneko zein asteburuko albisteez gain, albiste bitxiak ere izango dira, eta dei bereziren bat ere jasoko dute aurkezleek. Guztia bideo eta irudiez lagunduta.

Agurne Anasagastik gidatuko du tertulia garaia eta dagoeneko ezagunak ditugun hiru tertulia kide izango ditugu mahaiaren inguruan: Peio Zabala, Maitena Salinas eta Judas Arrieta. Aktualitateko kontu eta kuriositateak aipatuko dituzte. Gainera Peio Zabalak asteko eguraldiaren berri emango digu.

Internet eta sare sozialak oso gertutik jarraitzen ditugu eta programaren hasieran, Jon Urbietak galdera bat luzatzen die ikus-entzuleei eta erantzuna emateko hiru bide dituzte: twiter (@zuekhor), facebook (www.facebook.com/zuekhor) eta whatsapp (605779540). Gainera, egunero interneteko aplikazio berri bati buruz arituko da.

Hori guztia eta askoz gehiago 15:45etatik aurrera, ETB1en!