Onintza Enbeita gonbidatu, gaur gaueko 'Zuek Hor!!' saioan

Onintza Enbeita izango dute gonbidatu gaur gauean 'Zuek Hor!!' saioan. Programako sofa zurian eserita, Ibon Gaztañazpiren eta Marta Elviraren galderei erantzun beharko die Amaiur alderdiko diputatu eta bertsolariak ETB1en 22:25ean hasiko den saioan. Horrez gainera, ikus-entzuleek ere badaukate aukera Onintzari galderak egiteko, programaren webgunearen bidez.

Izatez kazetaria bada ere, azken urte hauetan politika munduan eta bertsolaritzan aritu da muxikarra. Umetatik bertso giroan bizi izan da, eta 2006. urteaz geroztik Bizkaiko Bertsolari Txapelketako final guztietara iritsi da. 2005eko eta 2009ko Euskal Herriko Txapelketan ere parte hartu zuen. Muxikako zinegotzia izan ostean, 2012ko ekainetik Madrilen aritu da, Amaiur alderdiko diputatu gisara, Kongresuan.

Azkenaldian jakin dugunez, Rocio Jurado du gustuko Onintza Enbeitak, eta oso iaioa da taroteko kartak botatzen. Bera izan zen, gainera, "coño" hitza Madrilgo Kongresuan erabili zuen bigarren pertsona, Tejeroren atzetik. Mila istorio kontatzeko dituen emakume itzela da Onintza, Enbeita familiako kideetako bat.

Aurkezleek egingo dizkioten galderei erantzuteaz gain, 'Zuek Hor!!' saioan ohikoak diren beste hainbat pertsonaia ere ezagutuko ditu Enbeitak, Andoitz eta Gorane umeak, La Jaio txonia, Patxi autobus-gidaria eta Boiseko bikotea, besteak beste. Las Vegas bisitatu ostean, Etxe Zurira joango dira oraingo honetan Michael Arejita eta Mary Lou Ordorika.

Anjel Alkain, Aitziber Garmendia, Ana Elordi eta Iker Galartza aktoreek hezurmamituko dituzten pertsonaien komeria eta pasadizoek umorez jantziko dute, astero bezala, Miramongo estudioetatik zuzen-zuzenean egingo den saioa. Aitor Gabilondoren eta Zukutu Banden musikaz girotuko dute emanaldia, eta Maialen Arzallus bertsolariak emango dio amaiera programari, saioan zehar esandakoak laburbilduz.

Asteartero legez, 'Zuek Hor!!' saioa 22:25etik aurrera egongo da ikusgai, ETB1en eta eitb.eus-en aldi berean.