Onomastika
Euskaltzaindiak pertsona izen neutroak onartu ditu lehen aldiz
eitb.eus
Orain arte, pertsona izen maskulino eta femeninoak soilik zerrendatzen zituen Akademiak Euskal Onomastikaren Datutegian, eta genero markarik gabeko 500 gehitu ditu: Alai, Amets, Kemen, Sustrai…
Jaioberriei eragingo die neurriak. Argazkia: EiTB
Euskaltzaindiak izen neutroak, genero markarik gabeak, sartu ditu bere pertsona izendegian lehenengoz, gaur Akademiaren mendeurrenaren kariaz Gasteizen egiten ari diren onomastika jardunaldietan iragarri dutenez. Horrelako 500 izen inguru gehitu dituzte (Alai, Aloña, Amaiur, Amets, Araitz, Artzain, Getari, Hurbil, Iraultza, Izaba, Jaizkibel, Kemen, Lohitzun, Sustrai…), eta pertsona izen txikigarriak, hipokoristikoak, ere (Aguxtin, Arritxu, Axun, Bittori, Engraxi, Frantxoa, Iñaxio, Itxaso, Ixabel, Jexux, Joxepe, Juantxo, Kattalin, Manu, Txetxu, Xabi…) txertatu dituzte.
Izendegi berriak izaera “irekia eta dinamikoa” izango du, aldiro-aldiro gaurkotuko dute (“zerrenda zabalik dago oraindik”) eta Akademiaren webgunean egongo da kontsultagarri, “Euskaltzaindiaren betebeharra baita euskal pertsona-izenen zuzentasun linguistikoa bermatzea”.
Euskaltzaindiak azaldu duenez, Espainiako legerian 1957ko Legeak beren-beregi debekatzen ditu “sexuari buruz okerra eragiten duten izenak”. Erregistro Zibilari buruzko 20/2011 Legeak ezabatu behar zuen debeku hori, baina oraindik ez da indarrean jarri.
Pertsona-izendegiarekin batera, Euskal Onomastika Datutegi berritua (100.000tik gora dira gehitutako erregistroak) eta Kale- eta karrika-izenen eskuliburua ere aurkeztu ditu gaur Akademiak Gasteizen, mendeurrena dela eta egin dituen zazpigarren jardunaldi akademikoetan.